ຮຽບຮຽງໂດຍ: ອານຸພົນ ຫວັງສະຫວັດ
ກວດແກ້ໂດຍ: ສຸກັນ ຈິດປັນຍາ
ການວາງແຜນນຳໃຊ້ທີ່ດິນ
ກວດແກ້ໂດຍ: ສຸກັນ ຈິດປັນຍາ
ການວາງແຜນນຳໃຊ້ທີ່ດິນ
ການວາງແຜນການນຳໃຊ້ທີ່ດິນ ຄືການຈຳແນກປະເພດການນຳໃຊ້ທີ່ດິນ ໃນແຜນຜັງຊີ້ນຳລວມ ໃຫ້ເປັນປະໂຫຍດມີດັ່ງນີ້:
- ກຳນົດການນໍາໃຊ້ທີ່ດິນແນໃສ່ສົ່ງເສີມການພັດທະນາ.
- ປ້ອງກັນການນຳໃຊ້ທີ່ດິນທີ່ຜິດເຮັດໃຫ້ເກີດບັນຫາ.
- ປ້ອງກັນການໃຊ້ທີ່ດິນທີ່ບໍ່ເໝາະສົມ ເຮັດໃຫ້ຂາດປະສິດທິພາບ.
- ປ້ອງກັນການເກັບຮັກສາທີ່ດິນໄວ້ໂດຍບໍ່ໄດ້ນຳໃຊ້ເຂົ້າໃນການຜະລິດ.
- ອະນຸລັກພື້ນທີ່ເພື່ອສາທາລະນຸປະໂຫຍດ ແລະ ສິ່ງແວດລ້ອມ.
- ກຳນົດທິດທາງ ເຮັດໂຄງການທັບມ້າງ, ສ້າງໃໝ່ ໃນຜັງເມືອງສະເພາະເພື່ອແກ້ໄຂພື້ນທີ່ທີ່ມີບັນຫາ ແລະ ທຳການຟື້ນຟູເພື່ອນຳພື້ນທີ່ທີ່ກຳລັງຈະມີບັນຫາກັບມາໃຊ້ໃຫ້ເປັນປະໂຫຍດ.
ມີສອງທັດສະນະທີ່ສໍາຄັນກ່ຽວກັບທີ່ດິນຄື: ທີ່ດິນເປັນຊັບພະຍາກອນ ຊຶ່ງທຸກຄົນມີສິດທີ່ໄດ້ຮັບຜົນປະໂຫຍດຮ່ວມກັນກັບທີ່ດິນ ແລະ ເປັນຊັບສິນສ່ວນບຸກຄົນ ສາມາດເຮັດໃຫ້ໄດ້ຮັບຜົນປະໂຫຍດຕາມສິດທິທີ່ຄອບຄອງ. ການວາງແຜນການນຳໃຊ້ທີ່ດິນ ຕ້ອງປະສານສົມທົບສອງທັດສະນະນີ້ໃຫ້ເກີດຄວາມເປັນທຳ
ຄືທີ່ດິນທີ່ເປັນສ່ວນຊັບພະຍາກອນທຳມະຊາດ ເປັນຜົນປະໂຫຍດສ່ວນລວມ
ທີ່ຕ້ອງໄດ້ຮັບການປົກປ້ອງຄຸ້ມຄອງ ແລະ ທີ່ດິນສ່ວນບຸກຄົນທີ່ເປັນກຳມະສິດຂອງບຸກຄົນ ຕ້ອງໄດ້ຮັບການສົ່ງເສີມໃຫ້ມີການນຳໃຊ້ ໃຫ້ເກີດມີຜົນປະໂຫຍດສຸງສຸດ.
ການຈຳແນກປະເພດການນຳໃຊ້ທີ່ດິນ ແມ່ນໄດ້ຈາກຜົນການວິເຄາະຂໍ້ມູນ ທີ່ໄດ້ເຮັດການຈຳແນກພື້ນທີ່ຕາມສັກກະຍະພາບ
ແລະ ຂໍ້ຈຳກັດ. ຕາມຫຼັກການທົ່ວໄປແລ້ວ ໄດ້ມີຫຼັກເກນການຈຳແນກດັ່ງນີ້:
ກ. ພື້ນທີ່ເຂດສະຫງວນໄວ້
ພື້ນທີ່ໆມີຄຸນຄ່າທາງທໍາມະຊາດ ແລະ
ນິເວດວິທະຍາຕະຫຼອດເຖິງແຫຼ່ງຜະ ລິດອາຫານການກິນ ທີ່ທຸກຄົນໄດ້ຮັບຜົນປະໂຫຍດຮ່ວມກັນ ຈຶ່ງຕ້ອງໄດ້ຮັບການປົກປ້ອງຄຸ້ມຄອງ ແລະ ປ້ອງກັນໃຫ້ຍັງ ດຳລົງຄົງຕົວໄວ້ຄຸນຄ່າທາງທຳມະຊາດ ແລະ
ນິເວດວິທະຍາ ບໍ່ໃຫ້ໄດ້ຮັບຜົນກະທົບຈົນເຮັດໃຫ້ເສຍ
ຄຸນຄ່າຍາກທີ່ຈະປົວແປງໃຫ້ກັບຄືນສູ່ສະພາບດັ່ງເດີມໄດ້. ມາດຕະເກນໃນການກຳນົດພື້ນທີ່ເຂດສະຫງວນໄວ້ມີດັ່ງນີ້ :
- ພື້ນທີ່ ທີ່ສູງຈາກຫນ້ານ້ຳທະເລ ປະມານ 1,000 ກວ່າແມັດ ຂຶ້ນໄປ ທີ່ເປັນແຫຼ່ງນ້ຳ, ຕົ້ນນ້ຳ ຮັກສາຄວາມຊຸມຊື່ນຂອງອາກາດ.
- ພື້ນທີ່ຊຸ່ມຊື່ນ ເປັນລະບົບນິເວດຂອງພືດ ແລະ ສັດ ຄືຊ່ວຍໃນການດູດຊັບນ້ຳຢູ່ເທິງໜ້າດິນ.
- ພື້ນທີ່ປ່າໄມ້ເຊັ່ນ: ປ່າສະຫງວນແຫ່ງຊາດ ເຂດອະນຸລັກພັນສັດປ່າ ທີ່ເປັນພື້ນທີ່ ທີ່ມີຄຸນຄ່າຕໍ່ນິເວດວິທະຍາ. ໂດຍປົກກະຕິແລ້ວ ພື້ນທີ່ສະຫງວນຈະບໍ່ຢູ່ໃນຂອບເຂດຊຸມຊົນເມືອງ ທີ່ກຳນົດເປັນເຂດ ທີ່ມີແຜນຜັງຊີ້ນຳລວມ ແຕ່ມີບາງກໍລະນີ ການຕັ້ງຖິ່ນຖານຂອງຊຸມຊົນມີລັກສະນະກະແຈກກະຈາຍ ຫຼື ຂະຫຍາຍຕົວເຂົ້າໃນ ພື້ນທີ່ໆໄກ້ຄຽງ ແລະ ສົ່ງຜົນສະທ້ອນແກ່ພື້ນທີ່ສະຫງວນໄວ້ ຈຶ່ງຖືກກຳນົດໃຫ້ເຂົ້າມາຢູ່ໃນ ເຂດແຜນຜັງຊີ້ນຳລວມ. ຕ້ອງມີຄວາມລະມັດລະວັງ ໃນການນໍາໃຊ້ທີ່ດິນທີ່ສົ່ງຜົນກະທົບໃນທາງກົງ ແລະ ທາງອ້ອມຕໍ່ພື້ນທີ່ສະຫງວນເຊັ່ນ: ການກໍ່ສ້າງຫົນທາງ, ການຂຸດອຸບມຸງ, ການກໍ່ສ້າງອາຄານຂະໜາດໃຫຍ່, ການຕົບແຕ່ງແປງສະພາບພື້ນທີ່ໜ້າດິນເປັນຕົ້ນ ເຖິງແມ່ນວ່າຈະຢູ່ນອກເຂດສະຫງວນ ແຕ່ກໍຍັງມີຜົນກະທົບຕໍ່ພື້ນທີ່ສະຫງວນ.
ຂ.
ພື້ນທີ່ອະນຸລັກ
ພື້ນທີ່ອະນຸລັກ ໝາຍເຖິງພື້ນທີ່ທີ່ຕ້ອງການ ຢາກບຳລຸງຮັກສາໃຫ້ມີຄຸນຄ່າໄວ້ ຢ່າງຍາວນານເຊັ່ນ: ພື້ນທີ່ ທີ່ມີຄຸນຄ່າທາງທຳມະຊາດ, ພູມີປະເທດທີ່ສວຍງາມ
ພື້ນທີ່ທາງປະຫວັດສາດ, ສີລະປະ, ວັດທະນະທຳ. ພື້ນທີ່ດັ່ງກ່າວນີ້
ສາມາດນຳໃຊ້ໃຫ້ມີຜົນປະໂຫຍດໄດ້ ແຕ່ບໍ່ເຮັດໃຫ້ຄຸນຄ່າດັ້ງເດີມ ທີ່ມີໄດ້ມີການເຊື່ອມໂຊມລົງ ລວມທັງພື້ນທີ່ອະນຸລັກ ທີ່ຢູ່ໃນ ແລະ ຢູ່ພື້ນທີ່ຂອງຊຸມຊົນ.
ຄ. ພື້ນທີ່ສໍາລັບພັດທະນາ
ພື້ນທີ່ ສຳຫຼັບພັດທະນາແມ່ນພື້ນທີ່ ທີ່ມີສັກກະຍະພາບ ນຳໃຊ້ສຳຫຼັບການຕັ້ງຖິ່ນຖານຂອງຊຸມຊົນ ຕອບສະໜອງແກ່ກິດຈະກຳທາງເສດຖະກິດ ແລະ ສັງຄົມໃນຊີວິດປະຈຳວັນ ໂດຍສະເພາະການກໍ່ສ້າງອາຄານສິ່ງປຸກສ້າງເພື່ອຢູ່ອາໄສ, ກໍ່ສ້າງໂຮງງານອຸດສາຫະກຳ
ແລະ ຮ້ານຄ້າຂາຍ, ພື້ນຖານໂຄງລ່າງສາທາລະນຸປະໂພກ ແລະ ສາທາລະນຸປະໂຫຍດ. ເກນໃນການກຳນົດພື້ນທີ່ ທີ່ເໝາະສົມສຳຫຼັບການພັດທະນາເປັນບ່ອນຕັ້ງຖິ່ນຖານມີດັ່ງນີ້:
- ພື້ນທີ່ ທີ່ມີຄວາມຊັນໃນລະດັບ 0.5 – 6 % ແມ່ນມີຄວາມເໝາະສົມແກ່ການຕັ້ງຖິ່ນຖານຊຸມຊົນ, ຖ້າພື້ນທີ່ມີຄວາມຊັນຕໍ່າກວ່າ 0.5 % ກໍເຫັນວ່າຈະມີນ້ຳຖ້ວມຂັງ ໂດຍສະເພາະໃນພື້ນທີ່ພັດທະນາ ອັນກວ້າງໃຫຍ່ເຊັ່ນ: ເຂດອຸດສາຫະກຳ, ບ້ານຈັດສັນ ຖ້າບໍລິເວນພື້ນທີ່ມີຄວາມຊັນສູງກວ່າ 6 % ອາດຈະເຮັດໃຫ້ຊີ້ນເປືອງ ສຳລັບຄ່າໃຊ້ຈ່າຍໃນການຈັດການສາທາລະນຸປະໂພກ ແລະ ສ່ຽງຕໍ່ການພັງທະລາຍຂອງດິນ. ເຖິງຢ່າງໃດກໍ່ດີ ບໍລິເວນພື້ນທີ່ມີຄວາມຊັນສູງກວ່າ 6 % ທີ່ຢູ່ໃນພູມີປະເທດທີ່ສວຍງາມ ອາດພັດທະນາເປັນທີ່ຢູ່ອາໄສຊັ້ນດີ ດ້ວຍການອອກຂໍ້ກຳນົດປ້ອງກັນຜົນກະທົບຕໍ່ສິ່ງແວດລ້ອມ.
- ການປຸກສ້າງອາຄານ ແລະ ສິ່ງປຸກສ້າງອື່ນໆ ຕ້ອງຢູ່ນອກຂອບເຂດບໍລິເວນການໄຫຼ ຫຼື ການລະບາຍນ້ຳ ໝາຍຄວາມວ່າບໍ່ເປັນສິ່ງກີດຂວາງການໄຫຼຂອງນ້ຳ ຖ້າບໍ່ດັ່ງນັ້ນກໍ່ຈະເຮັດໃຫ້ຊິ້ນເປືອງງົບປະມານ ໃນການເຮັດທໍ່ລອດພື້ນ, ການຖົມດິນ ຫຼື ການປ່ຽນເສັ້ນທາງໄຫຼທຳມະຊາດຂອງນ້ຳ ລວມທັງພື້ນທີ່ບໍລິເວນ ໜອງບຶງ ແລະ ຄອງນ້ຳທີ່ເປັນແຫຼ່ງທຳມະຊາດ ຄວນໄດ້ກຳນົດມາດຕະການປ້ອງກັນມົນລະພິດທີ່ອາດໄຫຼປົນເປື້ອນແຫຼ່ງນ້ຳ ຄືໃຫ້ຢູ່ໄກບໍລິເວນແຫຼ່ງທຳມະຊາດປະມານ 10 ມ ຂຶ້ນໄປ.
- ພື້ນທີ່ດິນເປັນດິນອ່ອນ ແລະ ພື້ນທີ່ ທີ່ມີແຫຼ່ງນ້ຳໃຕ້ດິນຕື້ນ ແມ່ນບໍ່ ເໝາະສົມແກ່ການກໍ່ສ້າງອາຄານສູງ, ອາຄານຂະໜາດໃຫຍ່, ໂຮງງານອຸດສາຫະກໍາ ແລະ ການກຳຈັດຂີ້ເຫຍື້ອແບບຝັງກົບ ຊຶ່ງຈະເຮັດໃຫ້ເກີດບັນຫາການກໍ່ສ້າງ, ການກຳຈັດສິ່ງເນົ່າ ເໝັນປະເພດສານຜິດປົນເປື້ອນໄຫຼສູ່ແຫຼ່ງນ້ຳໃຕ້ດິນ.
- ພື້ນທີ່ດິນທີ່ເປັນດິນອ່ອນ ແລະ ພື້ນທີ່ທີ່ມີແຫຼ່ງນ້ຳໃຕ້ດິນຕື້ນ ແມ່ນບໍ່ ເໝາະສົມແກ່ການກໍ່ສ້າງອາຄານ.
- ບໍລິເວນພື້ນທີ່ກະສິກຳໄດ້ກຳນົດກິດຈະກຳປູກຝັງ ແລະ ລ້ຽງສັດ ໃຫ້ ເໝາະສົມກັບຄຸນສົມບັດຂອງດິນ ເປັນແຫຼ່ງຜະລິດອາຫານທີ່ສະອາດມາຫຼໍ່ລ້ຽງຊຸມຊົນ.
ງ. ການນຳໃຊ້ທີ່ດິນສຳລັບພື້ນທີ່ໆເປັນຊຸມຊົນເມືອງ
ສຳຫຼັບພື້ນທີ່ ທີ່ມີສັກກາຍະພາບ ໃນການພັດທະນາໃຫ້ເປັນບ່ອນຕັ້ງຖິ່ນຖານຊຸມຊົນເມືອງ
ໄດ້ມີການນຳໃຊ້ທີ່ດິນຢ່າງຫຼາກຫຼາຍຕາມບົດບາດ ແລະ ປະຊາຊົນໃນຊຸມຊົນ.ເມືອງຂະໜາດໃຫຍ່ມີປະຊາກອນເປັນ ຈຳນວນຫຼາຍ ທີ່ໄດ້ນຳໃຊ້ທີ່ດິນຢ່າງຫຼາກຫຼາຍສະຫຼັບຊັບ ຊ້ອນຂຶ້ນກັບກິດຈະກຳ ໃນການໃຊ້ຊີວິດປະຈຳວັນຂອງປະຊາຊົນໃນເມືອງ, ການນຳໃຊ້ທີ່ດິນສຳຫຼັບເມືອງຂະໜາດນ້ອຍແມ່ນ
ບໍ່ມີຄວາມຫຼາກຫຼາຍ ແລະ ບໍ່ສັບສົນ ສ່ວນຫຼາຍກໍແມ່ນໄດ້ນຳໃຊ້ເພື່ອທີ່ຢູ່ອາໄສ ອັນເປັນພື້ນຖານ ພ້ອມກັບສິ່ງບໍລິການສາທາລະນະຂັ້ນພື້ນຖານ.
ປະເພດການນຳໃຊ້ທີ່ດິນຕົ້ນຕໍ
ແມ່ນການນຳໃຊ້ທີ່ດິນຂັ້ນພື້ນຖານ ທີ່ເປັນລັກສະນະທົ່ວໄປຂອງເມືອງໂດຍ ໄດ້ຈຳແນກອອກເປັນ
4 ປະເພດເຊັ່ນ: ບ່ອນຢູ່ອາໄສ, ການຄ້າ, ອຸດສາຫະກຳ
ແລະ ກະສິ ກຳ. ແຕ່ລະປະເພດສາມາດຈຳແນກເປັນອັນລະອຽດ ທີ່ມີອັນແຕກຕ່າງກັນຕາມຂະໜາດ ແລະ ບົດບາດຂອງຊຸມຊົນ. ເພິ່ນໄດ້ກຳນົດສີ່ງທີ່ເປັນສັນຍາລັກຢູ່ໃນແຜນຜັງດັ່ງນີ້
:
- ປະເພດທີ່ຢູ່ອາໄສ ໄດ້ຈຳແນກເປັນປະເພດຍ່ອຍດັ່ງນີ້:
+ ເຂດທີ່ຢູ່ອາໄສທີ່ມີຄວາມໜາແໜ້ນຕໍ່າ.
+ ເຂດທີ່ຢູ່ອາໄສທີ່ມີຄວາມໜາແໜ້ນປານກາງ.
+ ເຂດທີ່ຢູ່ອາໄສທີ່ມີຄວາມໜາແໜ້ນສູງ.
- ປະເພດການຄ້າແລ້ວໄດ້ຈຳແນກເປັນປະເພດຍ່ອຍດັ່ງນີ້:
+ ການຄ້າຂາຍຍ່ອຍ.
+ ການຂາຍຍົກ.
+ ການບໍລິການເປັນການປະກອບທຸລະກິດ
ແລະ ການຂາຍບໍລິການ.
- ປະເພດອຸດສາຫະກຳ ໄດ້ຈຳແນກເປັນປະເພດຍ່ອຍດັ່ງນີ້:
+ ອຸດສາຫະກຳ
ແລະ ສາງສິນຄ້າ.
+ ອຸດສາຫະກຳ
ສະເພາະກິດ.
+ ສາງສິນຄ້າ.
+ ອຸດສາຫະກຳທົ່ວໄປທີ່ບໍ່ເປັນມົນລະພິດຕໍ່ຊຸມຊົນ
ຫຼື ສິ່ງແວດລ້ອມ ແລະ ຄັງສິນຄ້າ.
- ປະເພດຊົນນະບົດ
ແລະ ກະສິກຳ ໄດ້ຈຳແນກເປັນປະເພດຍ່ອຍດັ່ງນີ້:
+ ອະນຸລັກເພື່ອ
ຊົນນະບົດ ແລະ ກະສິກຳ.
+ ອະນຸລັກສະພາບແວດລ້ອມ ເພື່ອການທ່ອງທ່ຽວ.
ຈ. ການນຳໃຊ້ທີ່ດິນປະເພດອື່ນໆ
ການນຳໃຊ້ທີ່ດິນປະເພດອື່ນໆ ລວມທັງການສົ່ງເສີມການນຳໃຊ້ດິນຫຼັກເພື່ອກິດ ຈະກຳປະເພດສຳຮອງ ທັງນີ້ກໍເພື່ອຕອບສະໜອງແກ່ການດຳລົງຊີວິດປະຈຳວັນ ໃນຊຸມຊົນ ແລະ ລວມເຖິງການນຳໃຊ້ເພື່ອກິດຈະກຳດ້ານສາທາລະນຸປະໂພກ ຫຼື ສາທາລະນຸປະໂຫຍດ ແລະ ການບໍລິການສາທາລະນະທີ່ມີຄວາມຈຳເປັນຕ້ອງໄດ້ນໍາໃຊ້ທີ່ດິນ. ເພິ່ນໄດ້ກຳນົດເປັນ
4ປະເພດດັ່ງນີ້ :
- ພື້ນທີ່ຫວ່າງເປົ່າ ( ພື້ນທີ່ໂລ່ງ ) ໃຊ້ໃນການຮັກສາສິ່ງແວດລ້ອມ ໄດ້ຈຳແນກປະເພດຍ່ອຍດັ່ງນີ້:
+ ພື້ນທີ່ຫວ່າງເປົ່າສຳຫຼັບການລ້ຽງສັດ ແລະ ການຮັກສາຄຸນນະພາບສິ່ງແວດລ້ອມ.
+ ພື້ນທີ່ຫວ່າງເປົ່າສະຫງວນໄວ້ສຳລັບຮັກສາສິ່ງແວດລ້ອມ.
+ ທີ່ດິນເພື່ອການອະນຸລັກປ່າໄມ້.
+ ພື້ນທີ່ຫວ່າງເປົ່າເພື່ອຮັກສາສິ່ງແວດລ້ອມ ແລະ ການປະມົງ.
+ ພື້ນທີ່ຫວ່າງເປົ່າເພື່ອຮັກສາສິ່ງແວດລ້ອມ ແລະ
ພື້ນທີ່ຊຸ່ມຊື້ນ.
+ ທີ່ດິນເພື່ອອະນຸລັກຮັກສາ ແລະ ສົ່ງເສີມເອກະລັກ ສິລະປະ, ວັດທະ ນະທຳ.
-
ປະເພດສຳລັບສະຖາບັນການປົກຄອງ ສຳນັກງານອົງການ.
-
ປະເພດສຳລັບສະຖາບັນສາສະໜາ.
-
ປະເພດສຳລັບສະຖາບັນການສຶກສາ.
ການວາງແຜນການນຳໃຊ້ທີ່ດິນປະເພດທີ່ຢູ່ອາໄສ
ການນຳໃຊ້ທີ່ດິນເພື່ອເປັນເຂດທີ່ຢູ່ອາໄສ ໝາຍເຖິງການນຳໃຊ້ທີ່ດິນຫຼັກປະເພດໜຶ່ງ ທີ່ໄດ້ກຳນົດໃນແຜນຜັງຕາມທີ່ໄດ້ຈຳແນກປະເພດ ແລະ ການນຳໃຊ້ທີ່ດິນສ່ວນໃຫຍ່ສຳລັບຊຸມຊົນນັ້ນ ແມ່ນໄດ້ກວມເອົາປະມານ 60 ຫາ 70 % ຂອງພື້ນທີ່ຊຸມຊົນທັງໝົດ. ເກນການວາງ ແລະ ການສ້າງແຜນຜັງການນຳໃຊ້ທີ່ດິນ ປະເພດທີ່ຢູ່ອາໄສມີດັ່ງນີ້:
ກ. ວິເຄາະຄວາມຕ້ອງການທີ່ຢູ່ອາໄສ
ປັດໄຈທີ່ເປັນຕົວກໍານົດຄວາມຕ້ອງການຮູບແບບເຮືອນຢູ່ ແລະ ບ່ອນຢູ່ອາໄສປະກອບດ້ວຍ: ສະພາບທາງເສດຖະກິດ ແລະ ສັງຄົມ ຂອງປະຊາຊົນໃນຊຸມຊົນນັ້ນ ທີ່ກ່ຽວກັບສະພາບການແຕ່ງງານອາຊີບ, ລາຍຮັບ, ອາຍຸ, ເຊື້ອຊາດ, ລະດັບການສຶກສາ, ສາດສະໜາ
ເປັນຕົ້ນ. ຕົວຢ່າງ ຜູ້ມີຄອບຄົວມັກຢູ່ເຮືອນປະເພດດ່ຽວ ຫຼາຍກວ່າເຮືອນປະເພດອື່ນ,ສ່ວນຜູ້ເປັນໂສດ ມັກຢູ່ອາໄສປະເພດເຮືອນພັກລວມໝູ່
ທີ່ຕັ້ງຢູ່ໃກ້ບ່ອນເຮັດວຽກງານ.
ສັງຄົມໄດ້ມີຄ່ານິຍົມ ກ່ຽວກັບຂະໜາດຂອງເຮືອນ, ກຳມະສິດທີ່ດິນ - ຊັບສິນ ແລະ ມີຄວາມນິຍົມມີທີ່ຢູ່ອາໄສທີ່ເປັນສ່ວນໜຶ່ງຂອງສະຖານທີ່ເຮັດວຽກ.
ການຍ້າຍຖິ່ນຖານຂອງປະຊາຊົນ ກໍ່ເປັນຕົວກຳນົດຄວາມຕ້ອງການທີ່ຢູ່ອາໄສ
ເພາະ ວ່າການຍ້າຍຖິ່ນຖານ ຂອງປະຊາຊົນ ແມ່ນມີລັກສະນະແຕກຕ່າງກັບການຍ້າຍທີ່ຢູ່ອາໄສ ຍ້ອນວ່າ ການຍ້າຍທີ່ຢູ່ອາໄສອາດຈະບໍ່ເຮັດ ໃຫ້ເພີ່ມຈຳນວນທີ່ຢູ່ອາໄສ ບາງຄັ້ງລັກສະນະທີ່ຢູ່ອາໄສອາດເປັນເຮືອນເຊົ່າ, ການຢູ່ຮ່ວມກັນ, ຫໍພັກ ແລະ ອື່ນໆ. ນອກຈາກນີ້ ກໍຍັງມີປັດໃຈອື່ນທີ່ຈະນຳພາພິຈາລະນາ
ນໍາມາວິເຄາະຮ່ວມດ້ວຍເຊັ່ນ: ລາຄາດິນ, ຄວາມສະດວກໃນການເດີນທາງເປັນຕົ້ນ.
ການວິເຄາະຄວາມຕ້ອງການທີ່ຢູ່ອາໄສ ຕ້ອງໄດ້ຜ່ານວິເຄາະຈາກຈຳນວນປະຊາກອນ,ຂະໜາດຄົວເຮືອນ ສະເລ່ຍໃນອະນາຄົດທີ່ກຳນົດໄວ້ໃນເປົ້າໝາຍຕາມການຄາດໝາຍ ການປ່ຽນແປງ ທາງດ້ານເສດຖະກິດ - ສັງຄົມ
ໃນຊຸມຊົນສົມທຽບກັບສະພາບຄວາມເປັນຈິງໃນປັດຈຸບັນບວກໃສ່ສະພາບ ການເຊື່ອມໂຊມຂອງເຮືອນຢູ່
ແລະ ຄາດຄະເນໃຫ້ມີເຮືອນຫວ່າງປະ ມານ 5 % ເພື່ອຮອງຮັບຜູ້ທີ່ຍ້າຍເຂົ້າມາຢູ່ໃໝ່.
ຂ. ການປະເມີນການໃຊ້ພື້ນທີ່ ແລະ ການກຳນົດທີ່ຕັ້ງ
ອາຄານທີ່ໃຊ້ສຳຫຼັບເປັນທີ່ຢູ່ອາໄສໄດ້ມີຫຼາຍປະເພດເຊັ່ນ: ເຮືອນດ່ຽວ,ເຮືອນຫ້ອງແຖວ, apartment ແລະ ອື່ນໆ. ໄປຕາມຄວາມຕ້ອງການບົນພື້ນຖານ ທາງດ້ານເສດຖະກິດ - ສັງຄົມຂອງປະຊາຊົນ. ຮູບແບບຂອງເຮືອນຢູ່ (
ຕົວອາຄານ ) ເປັນຕົວກຳນົດຂອງຕອນດິນ
ທີ່ໃຊ້ສຳຫຼັບການກໍ່ສ້າງອາຄານ ແລະ ຮອງຮັບຈຳນວນຜູ້ເຂົ້າຢູ່ອາໄສ ໃນອາ ຄານແຕ່ລະປະເພດ
ນຳໄປສູ່ການຈຳແນກຄວາມໜາແໜ້ນ ຂອງປະຊາກອນຢູ່ໃນພື້ນທີ່ ອອກເປັນຄວາມໜາແໜ້ນໜ້ອຍ, ໜາແໜ້ນປານກາງ ແລະ ໜາແໜ້ນສູງ.
ຊຸມຊົນເມືອງຂະໜາດກາງຢູ່ ສປປ ລາວ ແມ່ນມີຂະໜາດແຕ່
10,000 - 30,000ຄົນ ມາດຕະຖານການກຳນົດຂະໜາດການນຳໃຊ້ທີ່ດິນ
ເພື່ອການຢູ່ອາໄສດັ່ງນີ້:
ການນຳໃຊ້ປະເພດທີ່ດິນ
|
ຮູບແບບອາຄານ
|
ພື້ນທີ່
(ເຮັກຕາ)
|
ຄວາມໜາແໜ້ນ
(ຄົນ/ເຮັກຕາ)
|
ທີ່ຢູ່ອາໄສໜາແໜ້ນຕໍ່າ
|
ເຮືອນດ່ຽວ, ເຮືອນແຝດ
|
||
ທີ່ຢູ່ອາໄສໜາແໜ້ນປານກາງ
|
ເຮືອນປະເພດຫ້ອງແຖວອາຄານຊຸດສູງ
2-3 ຊັ້ນ
|
||
ທີ່ຢູ່ອາໄສໜາແໜ້ນສູງ
|
ພື້ນທີ່ ທີ່ຄາດຄະເນສຳລັບທີ່ຢູ່ອາໄສ ຈະຕ້ອງມີພື້ນທີ່ສຳຮອງໄວ້
ສຳລັບວຽກງານບໍ ລິການສາທາລະນະ ຊຶ່ງມີປະມານ 25
– 30 % ສຳລັບປະເພດທີ່ຢູ່ອາໄສ ທີ່ມີຄວາມໜາ ແໜ້ນໜ້ອຍ ແລະ 20 – 25 % ສຳລັບ ປະເພດທີ່ຢູ່ອາໄສ ທີ່ມີຄວາມໜາແໜ້ນປານກາງ
ແລະ ໜາແໜ້ນສູງ.
ຄ. ເກນການກຳນົດພື້ນທີ່
ເພື່ອກຳນົດເປັນປະເພດທີ່ຢູ່ອາໄສ.
ການກຳນົດແນວທາງການພັດທະນາໄດ້ມີຫຼັກເກນດັ່ງນີ້:
·
ການສ້າງຂໍ້ກຳນົດຕ້ອງຄຳນຶງເຖິງ ວັດຖຸປະສົງຂອງທີ່ຢູ່ອາໄສແຕ່ລະປະເພດ
ລວມທັງມີແຜນສົ່ງເສີມການນຳໃຊ້ທີ່ດິນແຕ່ລະປະເພດເຊັ່ນ: ຕ້ອງການໃຫ້ມີພື້ນທີ່ເປີດໂລ່ງ, ໂຮງຮຽນລ້ຽງເດັກ, ການນຳໃຊ້ທີ່ດິນແບບມີເງື່ອນໄຂ ( ທີ່ພົວພັນເຖິງຄວາມໜາແໜ້ນ, ການອະນຸຍາດໃຫ້ມີຫ້ອງການຢູ່ເຮືອນ ແລະ ບໍ່ໃຫ້ນຳໃຊ້ທີ່ດິນທີ່ເປັນອຸປະ
ສັກ ແກ່ການດຳລົງຊີວິດທີ່ດີເຊັ່ນ: ຟາມລ້ຽງສັດ, ສາງພະລັງງານເຊື້ອໄຟ, ສາງອາວຸດ, ການກຳຈັດຂີ້ເຫຍື້ອ,
ການຊື້ຂາຍເຫຼັກເສດ ແລະ ສິ່ງເສດເຫຼືອ,
ປ່າຊ້າ… )
·
ການກຳນົດຄວາມໜາແໜ້ນຂອງປະຊາກອນມີ 2 ວິທີດັ່ງນີ້: ກຳນົດຈາກແປງດິນທີ່ນ້ອຍທີ່ສຸດ ທີ່ຈະພັດທະນາຈະສ້າງເປັນທີ່ຢູ່ອາໄສໄດ້
ແລະ ກຳນົດຈາກອັດຕາສ່ວນການນຳໃຊ້ທີ່ດິນຄື:
+
ອັດຕາສ່ວນພື້ນທີ່ອາຄານລວມຕໍ່ພື້ນທີ່ດິນ (Floor area ratio ຫຼື FAR) ໝາຍເຖິງອັດຕາສ່ວນ ພື້ນທີ່ອາຄານລວມທຸກຊັ້ນ ຂອງອາຄານທຸກຫຼັງຕໍ່ພື້ນທີ່ດິນທີ່ໃຊ້ເປັນບ່ອນປຸກສ້າງອາຄານ.
+
ພື້ນທີ່ອາຄານ ໝາຍເຖິງພື້ນທີ່ອາຄານແຕ່ລະຊັ້ນ ທີ່ບຸກຄົນເຂົ້າຢູ່ ຫຼື ເຂົ້າໃຊ້ສອຍໄດ້ເຊັ່ນ: ລະບຽງ, ຫ້ອງໂຖງ… ແຕ່ບໍ່ໄດ້ລວມເອົາດາດຟ້າ ແລະ ຂັ້ນໄດທີ່ຢູ່ນອກຫຼັງຄາ.
ພື້ນທີ່ດິນ ໝາຍເຖິງພື້ນທີ່ຂອງຕອນດິນ ທີ່ນຳມາໃຊ້ອະນຸຍາດການປຸກສ້າງອາຄານ
ທີ່ມີເອກະສານ ກຳມະສິດໃບດຽວກັນ ຫຼື ຫຼາຍໃບທີ່ເປັນດິນຕິດຕໍ່ກັນ.
+ ອັດຕາສ່ວນພື້ນທີ່ຫວ່າງຕໍ່ພື້ນທີ່ອາຄານລວມ
(Open Space ratio ຫຼື OSR) ໝາຍເຖິງອັດຕາສ່ວນ ຂອງບ່ອນຫວ່າງທີ່ປະສະຈາກສິ່ງປົກຄຸມ
ຕໍ່ພື້ນທີ່ອາຄານລວມທຸກຊັ້ນ ຂອງອາຄານທຸກຫຼັງທີ່ກໍ່ສ້າງໃນດິນຕອນດຽວກັນ.
ພື້ນທີ່ຫວ່າງໝາຍເຖິງພື້ນທີ່ທີ່ປະສະຈາກສິ່ງປົກຄຸມ
ແລະ ຫຼັງຄາ, ພື້ນທີ່ດັ່ງກ່າວນີ້ອາດເປັນສະໜາມຫຍ້າ, ອ່າງອາບນ້ຳ, ບ່ອນຈອດລົດ,
ບ່ອນເກັບສິ່ງເສດເຫຼືອ ແລະ ໝາຍເຖິງ ພື້ນທີ່ກໍ່ສ້າງສູງຈາກໜ້າດິນ 1.20 ແມັດ ທີ່ບໍ່ມີຫຼັງຄາ.
(ຍັງມີຕໍ່)
(ຍັງມີຕໍ່)
No comments:
Post a Comment
Note: Only a member of this blog may post a comment.